I nominuari për kryeministër të Kosovës, Albin Kurti në një takim me qytetarët e Kodrës së Trimave në Prishtinë, tha se vetëm me Vetëvendosjen në qeveri, do të ketë transparencë e llogaridhënie dhe jo nepotizëm e kriminalitet. Ndërsa tha se populli duhet ta ndryshojë këtë udhëheqje, pasi që vendit i nevojitet ligj, rregull e drejtësi.

Kurti tha se koalicionet që janë kundër VV-së,  janë si mallra që shiten dhe blihen, e të cilave do t’u skadon afati më 11 qershor.

Dy koalicionet që garojnë kundër neve, jo për Kosovën, janë koalicione si mallra që shiten e blihen. Duan dhe Kosovën ta shesim edhe territorin dhe pasuritë publike dhe njerëzit. Mallrave të tyre dhe atyre si mall, u skadon afati më 11 qershor. Partitë e tjera janë bërë bashkë, për ta ndarë buxhetin kundër popullit. Lëvizja VV është për ta rritur buxhetin për qytetarët”, tha ai.

Kurti tha se dy të nominuarit e partive tjera për kryeministër, Ramush Haradinaj dhe Avdullah Hoti,  premtojnë pa mbulesë, pasi që e dinë se nuk do të bëhen kryeministra dhe se askush s’do të kërkojë llogari për premtimet e tyre pa mbulesë.

“Për dallim nga dy kandidatet e tjerë, ne të VV-së dhe unë si i nominuar për kryeministër, nuk premtojmë pa mbulesë dhe rrejshëm. Atyre askush nuk ua zë për të madhe. Sepse janë mësuar me ta. Ka edhe një arsye tjetër. Sepse e dinë se nuk do të bëhen kryeministra dhe askush s’do t’u kërkojë llogari për premtimet e tyre pa mbulesë“, tha ai.

Ndërsa kryetari i Komunës së Prishtinës, Shpend Ahmeti tha se kodra e Trimave nuk ka qenë kurrë bastion i asnjë subjekti politik, por ka qenë bastion i trimave të Prishtinës. Ndërsa tha se është koha që të përmbytet sistemi i tanishëm politik dhe të vie në qeverisja VV-ja në krye me Albin Kurtin, pasi që është koha që PDK të shkojë aty ku e ka vendin, në opozitë.

“Kohë e mirë po na mban sot. Kohë të mira po vijnë për Kosovën. Kohë e mirë po vjen dhe për Kodrën e Trimave. E pyeta Albinin edhe sa kanë mbetur te fitorja. Ky tha edhe 60 orë e gjysmë deri tek fitorja e VV-së. Kodra e Trimave nuk është dhe s’ka qenë bastion i asnjë subjekti politik. Kodra e Trimave është bastion i trimave të Prishtinës. Ne i kemi provuar të gjitha partitë politike, koalicionet. Edhe pse vinin në këtë lagje dhe u thonin se kurrë s’do të bëjnë koalicion me PDK-në. Ata persona na e lan peshqesh Hashim Thaçin president dhe na lan peshqesh Kadri Veselin kryeparlamentar. Këtë  nuk ia kanë pasur borxh Prishtina, e as Kodra e Trimave. Nëse vijnë dhe ua kërkojnë votën, duke thënë se s’do të hyjnë në koalicion me PDK-në, mos u besoni. Koha është që PDK të shkojë në opozitë, aty ku e ka vendin në 4 vitet e ardhshme”, tha ai./arbresh.info/